Ngatidetembanei Mutsumo

Ngatidetembanei muTsumo ibhuku renhetembo dzakaumbwa kuburikidza nekubatanidzwa kwetsumo dzakasiyana-siyana. Vakuru vedu vakare vaive neuchenjeri hwekutaura nezveupenyu zvinosanganisira mhuri, rudzi, rufu, kuzvarwa, kugarisana kwakanaka nezvimwe zvakadaro. Nazvino uno uchenjeri hwekutaura uku inhaka yedu. Kureva iko kuti chose cheupenyu, magariro nemararamiro edu chinoperekedzwa nemazwi kana zvirevo zvine hungwaru hwakadzama. Tsumo inhaka yemutauro watakasiirwa hwatakachengetedza uye hwatiri kuramba tichichengetedza kubudikidza mukutaura, muzvinyorwa nemudzidzo. Tsumo kutaura kwevakuru kana kuti chirevo chakataurwa kare-kare nevakuru senzira yekudzidzisa, kuyambira kana kusimbisana nezveupenyu. Ngatidetembanei muTsumo ibhuku ranhasi rakanyorwa neunyanzvi hwekuchengera nekuchengetedza mutauro weTsumo. Bhuku rino, idura kana kuti pfimbi yeTsumo dzakanyorwa asi dzichipakurwa senhetembo. Achishandisa zvidopi zvekudetemba, Nyanduri anobuditsa zvakare idzo tsumo dzakare nedzemazuva ano achidzivhenganisa. Izvi zvinoratidza kuti mutauro wedu unoita uchikura nekutishandukei pamusaka pekushanduka kuri kuita upenyu asi huchiramba hwakazembera padzinde retsika nemagariro edu vaTema. Kurasika kwemutauro ndiko kurasika kwegwara retsika nemagariro. Ngatidetembanei muTsumo ibhuku rinopa ruzivo rwezvemutauro wedu wakapfuma kuvakuru nevadiki nenzira inodzidzisa kuzipa uye rinopa chidokwa-dokwa chekuchengetedza rurimi rwaamai.